वेळू येथे पाच वाहनांच्या अपघातात दुचाकी चालक जागीच ठार
पुणे फास्ट 24 न्यूज
खेड-शिवापूर, ता. 7 : ट्रक चालकाचे ट्रकवरील नियंत्रण सूटल्याने ट्रकने चार वाहनांना पाठीमागून धडक देऊन झालेल्या अपघातात एक जण जागीच ठार झाला. तर दोन जण जखमी झाले आहेत. पुणे सातारा रस्त्यावर वेळू (ता.भोर) येथे शुक्रवारी दुपारी हा अपघात झाला. मृत आणि जखमींची नावे अजून समजली नाहीत.
याबाबत राजगड पोलिसांनी माहिती दिली. शुक्रवारी एक ट्रक पुण्याहून साताऱ्याच्या दिशेने निघाला होता. दुपारी एक वाजण्याच्या सुमारास ससेवाड़ी उड्डाण पुलावरून खाली उतरत असताना ट्रक चालकाचे ट्रकवरील नियंत्रण सुटले. यावेळी या ट्रकची दोन दुचाकी, एक मोटारगाडी आणि एका टँकरला पाठीमागून धडक बसली. या अपघातात एका दुचाकीवरील एक जण जागीच ठार झाला. तर दुसऱ्या दुचाकीवरील दोन जण जखमी झाले आहेत. मृत आणि जखमींची नावे अजून समजली नाहीत. याप्रकरणी गुन्हा दाखल करण्याचे काम सुरु होते.
अपघाताची माहिती मिळताच राजगड पोलिस, महामार्ग पोलिस ताबडतोब घटनास्थळी दाखल झाले. जखमींना रुग्णालयात दाखल करून अपघातातील वाहने त्यांनी बाजूला केली.
